مع ان كل الخلق من اصل طين
وكلهم بينزلوا مغمضين بعد
الدقايق والشهور والسنين
تلاقى ناس اشرار وناس طيبين
عجبى!!
---------------------
عجبى عليك..عجبى عليك يا زمن
يابو البدع يا مبكى عينى دما
ازاى انا اختار لروحى طريق
وانا اللى داخل فى الحياه مرغما
عجبى!!
------------------------
مرغم عليك ياصبح مغصوب ياليل
لا دخلتها برجليا ولا كانلى ميل
شايلنى شيل دخلت انا فى الحياه
وبكره ح اخرج منها شايلنى شيل
عجبى!!
---------------------------
سنوات وفايته عليا فوج بعد فوج
واحده خدتنى ابن والتانيه زوج
والتالته اب خدتنى والرابعه ايه
ايه يعمل اللى بيحدفه موج لموج؟
عجبى!!
------------------------
وانا فى الضلام من غير شعاع يهتكه
اقف مكانىبخوف ولا اتركه
ولما ييجى النور واشوف الدروب
احتار زياده ..ايهم اسلكه؟
عجبى!!
-----------------------------
نظرت فى الملكوت كتير وانشغلت
وبكل كلمه(ليه؟)و(عشانيه)سالت
اسال سؤال .. الرد يرجع سؤال
واخرج وحيرتى اشد مما دخلت
عجبى!!
---------------------------
خرج ابن ادم م العدم قلت :ياه
رجع ابن ادم للعدم قلت:ياه
تراب بيحيا .. وحى بيصير تراب
الاصل هو الموت ولا الحياه ؟
عجبى!!
-------------------------
ضريح رخام فيه السعيد اندفن
وحفره فيها شريد من غير كفن
مريت عليهم .. قلت ياه للعجب
الاتنين رحتهم فيها نفس العفن
عجبى!!
------------------------------
ياما صادفت صحاب وما صحبتهمش
وكاسات خمور وشرابوما شربتهمش
اندم على الفرص اللى انا سبتهم
ولا على الفرص اللى ماسبتهمش
عجبى!!
-------------------------
والكون ده كيف موجود من غير حدود
وفيه عقارب ليه وتعابين ودود
عالم مجرب فات وقال سلامات
ده ياما فيه سؤالات من غير ردود
عجبى!!
-------------------------
غدر الزمان ياقلبى مالهوش امان
وحاييجى يوم نحتاج لحبه ايمان
قلبى ارتجف وسالنى .. اامن بايه؟
اامن بايه محتار بقالى زمان
عجبى!!
----------------------------
ياباب يامقفول .. امتى الدخول
صبرت ياما واللى يصبر ينول
دقيت سنين .. والرد يرجعلى :مين؟
لو كنت عارف مين انا .. كنت اقول
عجبى!!
-------------------------
انا شاب لكن عمرى ولا الف عام
وحيد ولكن بين ضلوعى زحام
خايف ولكن خوفى منى انا
اخرس ولكن قلبى مليان كلام
عجبى!!
---------------------------
احب اعيش ولو اعيش فى الغابات
اصحى كما ولدتنى امى وابات
طائر..حيوان..حشره..بشر..بس اعيش
محلا الحياه.. حتى فى هيئه نبات
عجبى!!
------------------------
سهير ليالى وياما لفيت وطفت
وف ليله راجع فى الضلام قمت شفت
الخوف .. كانه كلب سد الطريق
وكنت عاوز اقتله .. بس خفت
عجبى!!
-------------------------
عجبتنى كلمه من كلام الورق
النور شرق من بين حروفها وبرق
حبيت اشيلها فى قلبى..قالت حرام
ده انا كل قلب دخلت فيه اتحرق
عجبى!!
---------------------------
رقبه زجاجه وقلبى فيها انحشر
شربت كاس واتنين وخامس عشر
صاحبت ناس م الخمره ترجع وحوش
وصاحبت ناس م الخمره ترجع بشر
عجبى!!
----------------------
كل اللى فى الخماره صابهم جنون
صبحوا الرجال يتبادلون كاس المنون
وبدم ونبيت انكتب على الجدران
"ياميت ندامه على اللى قلبه حنون"
عجبى!!
--------------------------
قالو الشقيق بيمص دم الشقيق
والناس ما هياش ناس بحق وحقيق
قلبى رميته وجبت غيره حجر
داب الحجر . . . ورجعت قلبى رقيق
عجبى!!
------------------------
يوم قلت اه. . سمعونى قالوا فسد
ده كان جدع قلبه حديد واتحسد
رديت على الايمين انا وقلت..اه
لوتعرفوا معنى زئير الاسد
عجبى!!
-----------------------------
بين موت وموت ..بين النيران والنيران
ع الحبل ماشيين الشجعان والجبان
عجبى على دى حياه .. ويا للعجب
ازاى انا _ياتخين_بقيت بهلوان
عجبى!!
---------------------------
انا قلبى كان شخشيخه اصبح جرس
جلجلت بيه صحيوا الخدم والحرس
انا المهرج.. قمتو ليه خفتو ليه
لاف ايدى سكين ولا تحت منى فرس
عجبى!!
--------------------------
دخل الربيع يضحك لقانى حزين
نده الربيع على اسمى قلت مين
حط الربيع ازهاره جنبى وراح
وايش تعمل الازهار للميتين
عجبى!!
مهبوش بخربوش الالم والضياع
قلبى ومنزوع من الضلوع انتزاع
يا مرايتى ياللى بترسمى ضحكتى
يا هل ترى ده وش ولا قناع
عجبى
حبيت ... لكن حب من غير حنان
وصاحبت لكن صحبه مالهاش امان
رحت لحكيم واكتر لقيت بلوتى
ان اللى جوه القلب مش ع اللسان
عجبى
ليه يا حبيبتى ما بينا دايما سفر
ده البعد ذنب كبير لا يغتفر
ليه يا حبيبتى ما بينا دايما بحور
اعدى بحر الاقى غيره اتحفر
عجبى
ورا كل شباك الف عين مفتوحين
وانا وانتى ماشيين يا غرامى الحزين
لو التصقنا نموت بضربه حجر
ولو افترقنا نموت متحسرين
عجبى
نوح راح لحاله والطوفان استمر
مركبنا تايهه لسه مش لاقيه بر
اه م الطوفان واهين يا بر الامان
ازاى تبان والدنيا مليانه شر
عجبى
على رجلى دم .. نظرت له ما احتملت
على ايدى دم .. سالت :ليه؟لم وصلت
على كتفى دم وحتى على راسى دم
انا كلى دم .. قتلت؟.. ولا اتقتلت؟
عجبى
انا كل يوم اسمع .. فلان عذبوه
اسرح فى بغداد والجزاير واتوه
ما اعجبش م اللى يطيق بجسمه العذاب
واعجب من اللى يطيق يعذب اخوه
عجبى
ينبوع وفى الحواديت سمعت عنه
انه عجيب .. وف وسط لهاليب لكنه
شقيت كما الفرسان طريقى .. لقيت
حتى الخنازير والكلاب شربوا منه
عجبى
يا قرص شمس ما لهش قبه سما
يا ورد من غير ارض شب ونما
يا اى معنى جميل سمعنا عليه
الخلق ليه عايشين حياه مؤلمه
عجبى
شاف الطبيب جرحى وصفله الامل
وعطانى منه مقام يا دوب ما اندمل
مجروح جديد يا طبيب وجرحى لهيب
ودواك فرغ منى .. وايه العمل ؟
عجبى
اعرف عيون هى الجمال والحسن
واعرف عيون تاخد القلوب بالحضن
وعيون مخيفه وقاسيه وعيون كتير
وبحس فيهم كلهم بالحزن
عجبى
ايش تطلبى يا نفسى فوق كل ده
حظك بيضحك وانتى متنكده
ردت قالت لى نفسى:قول للبشر
ما يبصوليش بعيون حزينه كده
عجبى
اقلع غماك يا تور وارفض تلف
اكسر تروس الساقيه واشتم وتف
قال: بس خطوه كمان.. وخطوه كمان..
يا اوصل نهايه السكه يا البير يجف
عجبى
يا حزين يا قمقم تحت بحر الضياع
حزين انا زيك وايه مستطاع
الحزن ما بقالهوش جلال يا جدع
الحزن زى البرد .. زى الصداع
عجبى
فى يوم صحيت شاعر براحه وصفا
الهم زال ةالحزن راح اختفى
خدنى العجب وسالت روحى سوال
انا مت ؟ .. ولا وصلت للفلسفه؟
عجبى
الفيلسوف قاعد يفكر سيبوه
لا تعملوه سلطان ولا تصلبوه
ما تعرفوش انى الفلاسفه يا هوه
اللى يقولوه بيرجعوا يكدبوه؟
عجبى
على بعد مليون ميل من ارضنا
من الفراغ الكونى بصيت انا
لا شفت فرق بين جبال وبحور
ولا شفت فرق ما بين العذاب والهنا
عجبى
انسان يا انسان ما اجهلك
ما اتفهك فى الكون وما اضالك
شمس وقمر وسدوم وملايين نجوم
وفاكرها يا موهوم مخلوقه لك !!
عجبى
نظرت فوقى للنجوم وانا ساير
رجليا عترت فى الحفر والحجاير
بقيت اقول وانا ع التراب:يا سلام
مش بس عبره اخذت لكن عباير
عجبى
يا نجم .. نورك ليه كده بيرتجف؟
هو انت قنديل زيت؟.. او تختلف؟
-انا نجم عالى .. بس عالى قوى
وكل ما نظرت تحت اخاف انحدف
عجبى
السم لو كان فى الدوا .. منين يضر؟
والموت .. ولو لعدونا .. منين يسر ؟
حط القلم فى الحبر واكتب كمان
. . . والعبد للشهوات . . منين هو حر؟
عجبى
وقفت بين شطين على قنطره
الكدب فين والصدق فين يا ترى
محتار ح موت .. الحوت خرج لى وقال
هو الكلام يتقاس بالمسطره؟
عجبى
سرداب فى مستشفى الولاده طويل
صرخات عذاب ورا كل باب وعويل
.. وفى الطريق متزوقين البنات
متزوقين للحب والمواويل
عجبى
الدنيا اوده كبيره للانتظار
فيها ابن ادم زيه زى الحمار
الهم واحد .. والملل مشترك
ومفيش حمار بيحاول الانتحار
عجبى
ايوب رماه البين بكل العلل
سبع سنين مرضان وعنده شلل
الصبر طيب .. صبر ايوب شفاه
بس الاكاده مات بفعل الملل
عجبى
نسمه ربيع لكن بتكوى الوشوش
طيور جميله بس من غير عشوش
قلوب بتخفق .. انما وحدها
هى الحياه كده.. كلها فى الفاشوش
عجبى
يا طير يا عالى فى السما طظ فيك
ما تفتكرش ربنا مصطفيك
برضك بتاكل دود و للطين تعود
تمص فيه يا حلو .. ويمص فيك
عجبى
كروان جريح مضروب شعاع م القمر
سقط من السموات فؤاده انكسر
جريت عليه قطه عشان تبلعه
اتاريه خيال شعرا مالهوش اثر
عجبى
ياللى نصحت الناس بشرب النبيت
مع بنت حلوه .. وعود،وضحك،وحديت
مش كنت تنصحهم منين يكسبوا
تمن ده كله ؟ .. ولا يمكن نسيت
عجبى
ما حد فى الدنيا دى واخد جزاته
ولا حد بيفكر فى غير لذاته
ما تعرفيش يا حبيبتى..انا وانتى مين؟
انتى عروس النيل .. وانا النيل بذاته
عجبى
رقاصه خرسا ورقصه منغير نغم
دنيا .. يا مين يصالحها قبل الندم
ساعتين تهز بوجهها يعنى لا
يترجرجوا نهديها يعنى نعم
عجبى
اخطفنى ياللى تحبنى ع الحصان
الدنيا قالت يوم فى ماضى الزمان
اخطفنى ياللى تحبنى ع الفرس
الدنيا قالت .. قام خطفها الشيطان
عجبى
من شقوق الشيش وشقشقت لك
مع شهقة العصافير وزقزقت لك
نهار جديد انا .. قوم نشوف نعمليه
انا قلت يا ح تقتلنى .. يا ح اقتلك
عجبى
قلبى عليل يا ناس وفى الكاس دواه
مديت له ايدى شربت م اللى حواه
جنبى الشمال خف .. اليمين اتوجع
وايه يداوى الكبد م اللى كواه
عجبى
...دى مذكرات وكتبتها من سنين
فى نوته زرقا لون بحور الحنين
عترت فيها .. رميتها فى المهملات
وقلت اما صحيح كلام مخبولين
عجبى
دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت فى ليل الشتا
لكن حاجات اكتر بترفض تموت
عجبى
-الدنيا من غير الربيع ميته
ورقه شجر ضعفانه ومفتفته
-لا يا جدع غلطان تامل وشوف
زهر الشتا طالع فى عز الشتا
عجبى
ياللى انت بيتك قش مفروش بريش
تقوى عليه الريح . يصبح مفيش
عجبى عليك حواليك مخالب كبار
وما لكش غير منقار وقادر تعيش
عجبى
سمعت نقطه ميه جوه المحيط
بتقول لنقطه ما تنزليش فى الغويط
اخاف عليكى م الغرق .. قلت انا
ده اللى يخاف م الوعد يبقى عبيط
عجبى
جالك اوان ووقفت موقف وجود
يا تجود بده يا قلبى يا بده تجود
ما حد يقدر يبقى على كل شئ
مع ان -عجبى- كل شئ موجود
عجبى
جالك اوان وعرفت مش الجنايز
كيف شفتها يا عبد رب اللذايذ
قال: شفت شيل بالحيل فقير او امير
كما شالوا فى الخمامير فواضى القزايز
عجبى
انا كنت شئ وصبحت شئ ثم شئ
شوف ربنا .. قادر على كل شئ
هز الشجر شواشيه ووشوشنى قال:
لابد يموت شئ عشان يحيا شئ
عجبى
يا مشرط الجراح امانه عليك
وانت ف حشايا تبص من حواليك
فيه نقطه سوده فى قلبى بدأت تبان
شيلها كمان .. والفضل يرجع اليك
عجبى
كيف شفت قلبى والنبى يا طبيب
همد ومات ولا سامع له دبيب
قاللى لقيته مختنق بالدموع
ومالوش دوا غير لمسه من ايد حبيب
عجبى
تسلم يا غصن الخوخ ياعود الحطب
ييجى الربيع .. تطلع زهورك عجب
وانا ليه بيمضى ربيع وييجى ربيع
ولسه برضك قلبى حته خشب
عجبى
بحر الحياه مليان بغرقى الحياه
صرخت خش الموج فى حلقى ملاه
قارب نجاه! .. صرخت قالوا مفيش
غير بس هو الحب قارب نجاه
عجبى
فارس وحيد جوه الدروع الحديد
رفرف عليه عصفور وقال نشيد
منين منين..ولفين لفين يا جدع
قال من بعيد ولسه رايح بعيد
عجبى
كان فى قمر كأنه فرخ الحمام
على صغره دق شعاع شق الغمام
انا كنت حاضر قلت له ينصرك
اشحال لما ح تبقى بدر التمام
عجبى
النهد زى الفهد نط اندلع
قلبى انهبش بين الضلوع وانخلع
ياللى نهيت البنت عن فعلها
قول للطبيعه كمان تبطل دلع
عجبى
صوتك يا بنت الايه كأنه بدن
يرقص يزيح الهم يمحى الشجن
يا حلوتى وبدنك كأنه كلام
كلام فلاسفه سكروا نسيوا الزمن
عجبى
كرباج سعاده وقلبى منه انجلد
رمح كأنه حصان ولف البلد
ورجع لى نص الليل وسالنى .. ليه
خجلان تقول انك سعيد يا ولد
عجبى
مزيكه هاديه الكون فيها انغمر
وصيف وليل وعقد فل وسمر
يا هلترى الناس كلهم مبسوطين
ويا هلترى شايفين جمال القمر؟
عجبى
انشد ياقلبى غنوتك للجمال
وارقص فى صدرى من اليمين للشمال
ما هوش بعيد تفضل لبكره سعيد
ده كل يوم فيه الف الف احتمال
عجبى
اه لو انا ومحبوبى جزنا الفضا
فى سفينه وحدينا .. واشيا رضا
ساعه صفا تعجبنا نرجع لها
والهم قبل ما ييجى .. يبقى مضى
عجبى
انا اله الوجد رب الهيام
اضرب بسهم الوهم وهم الغرام
وهم الغرام من كتر ما هو لذيذ
رشقت انا فى صدرى جميع السهام
عجبى
حدوته عن جعران وعن خنفسه
اتقبلوا حبوا بعض ساعه مسا
ولا قال لهم حد اختشوا عيب حرام
ولا قال دى علاقه متدنسه
عجبى
ياللى عرفت الحب يوم وانطوى
حسك تقول مشتاق لنبع الهوى
حسك تقول مشتاق لنبع الغرام
ده الحب..مين داق منه قطره..ارتوى
عجبى
زحام وابواق سيارات مزعجه
اللى يطول له رصيف .. يبقى نجا
لو كنت جنبى يا حبيبى انا
مش كنت اشوف انى الحياه مبهجه؟
عجبى
ايديا فى جيوبى وقلبى طرب
سارح فى غربه بس مش مغترب
وحدى لكن ونسان وماشى كده
وبابتعد...ماعرفش...او بقترب
عجبى
يا ميت ندامه ع القلوب الخلا
لا محبه فيها ولا كراهه ولا
حتى يا قلبى الحزن ما عادش فيك
معلش ... لك يوم برضو راح تتملا
عجبى
مرحب ربيع مرحب ربيع مرحبه
ياطفل ياللى ف دمى ناغا وحبا
علشان عيونك يا صغنن هويت
حتى ديدان الارض والاغربه
عجبى
فتحت شباكى لشمس الصباح
ما دخلش منه غير عويل الرياح
وفتحت قلبى علشان ابوح بالالم
ماخرجش منه غير محبه وسماح
عجبى
غمست سنك فى السواد يا قلم
علشان ما تكتب شعر يقطر الم
مالك جرالك ايه يا مجنون..وليه
رسمت ورده وبيت وقلب وعلم
عجبى
انا الذى عمرى اشتياق فى اشتياق
وقطر داخل فى محطه فراق
قصدت نبع السم وشربت سم
من كتر شوقى وعشمى فى الترياق
عجبى
انا الذى عشت الزمن مضيعه
بروح حزينه معفنه مضعضعه
زرعت شجره سنط لجل انجرح
لقيتها شعر البنت ومفرعه
عجبى
لو فى سلام فى الارض وطمان وامن
لو كان مفيش ولا فقر ولا خوف وجبن
لو يملك الانسان مصير كل شئ
انا كنت اجيب للدنيا ميت الف ابن
عجبى
العشب طاطا للنسايم ونخ
اخضر طرى مالهش فى الحسن اخ
عصفور عبيط انا ..غاوى بهجه وغنا
ح انزل هنا .. وانشالله يهبرنى فخ
عجبى
اوصيك يا ابنى بالقمر والزهور
اوصيك بليل القاهره المسحور
وان جيت فى بالك .. اشترى عقد فل
لاى سمرا .. وقبرى اوعك تزور
عجبى
غمض عنيك وارقص بخفه ودلع
الدنيا هى الشابه وانت الجدع
تشوف رشاقه خطوتك تعبدك
لكن انت لو بصيت لرجليك ..تقع
عجبى
حاسب من الاحزان وحاسب لها
حاسب على رقابيك من حبلها
راح تنتهى ولابد راح تنتهى
مش انتهت احزان من قبلها؟
عجبى
يأسك وصبرك بين ايديك وانت حر
تيأس ما تيأس الحياه راح تمر
انا دقت مندا ومندا عجبى لقيت
الصبر مر وبرضك الياس مر
عجبى
ولدى نصحتك لما صوتى اتنبح
ما تخافش من جنى ولا من شبح
وان هب فيك عفريت قتيل اساله
ما دافعش ليه عن نفسه يوم ما اندبح؟
عجبى
ولدى اليك بدل البالون ميت بالون
انفخ وطرقع فيه على كل لون
عساك تشوف بعينك مصير الرجال
النفوخين فى الستره والبنطلون
عجبى
خوض معركتها زى جدك ما خاض
صالب وقالب شفتك بامتعاض
هى كده .. ما تنولش منها الامل
غير بعد صد ورد ووجاع مخاض
عجبى
كام اشتغلت يا نيل فى نحت الصخور
مليون بئونه والف مليون هاتور
يا نيل انا ابن حلال ومن خلفتك
وليه صعيبه على بس الامور
عجبى
منين اجيبها كلمه متالمه
لعبيه فايره حايره ومصممه
منين اجيب كلمه تكون بنت ارض
تشفى اللى ما شفاهوش كلام السما
عجبى
انا قلت كلمه وكان ليها معنيين
كما بطن واحده وتوأمين زين وشين
لو دنيا شر .. التوأم الخير يموت
لو دنيا خير .. الشر ح يعيش منين؟
عجبى
انا اللى بالامر المحال اغتوى
شفت القمر نطيت لفوق فى الهوا
طلته ما طلتوش ايه انا يهمنى
وليه ... ما دام بالنشوه قلبى ارتوى
عجبى
بره القزاز كان غيم واطار وبرق
مايهمنيش -انا قلت- ولا عندى فرق
غيرت رأيى بعد ساعه زمان
وكنت فى الشارع ... وفى الجزمه خرق
عجبى
عينى رأت مولود على كتف امه
يصرخ تهنن فيه يصرخ تضمه
يصرخ تقوله يابنى ما تنطق كلام
ده اللى ما يتكلمش يا كتر همه
عجبى
ياعندليب ما تخافش من غنوتك
قول شكوتك واحكى عن بلوتك
الغنوه مش ح تموت انما
كتم الغنا هو اللى ح يموتك
عجبى
يا للى بتبحث عن اله تعبده
بحث الغريق عن اى شئ ينجده
الله جميل وعليم ورحمن رحيم
احمل صفاته...وانت راح توجده
عجبى
موضوع: رباعيات صلاح جاهين 
الخميس 11 نوفمبر 2010 - 7:22
